¿Qué ye GNU/Linux?

Cuando escuches la pallabra Linux, pue qu'imaxines desendolcadores con barba escribiendo llargues llinies de códigu nuna pantalla prieta. ¡Bones noticies! Les coses camudaron.

La imaxe

Linux ye un sistema operativu, una gran pieza de software que remana un ordenador. Ye asemeyáu a Microsoft Windows, pero dafechu llibre. El nome correutu ye GNU/Linux pero "Linux" úsase más.

Linux nun ye'l productu d'una sola compañía, ye'l resultáu de la contribución d'un númberu pergrande de compañíes y grupos de persones. El sistema GNU/Linux ye un componente central, que tresfórmase en munchos productos distintos: les denomaes distribuciones.

Les distribuciones camuden ensembre l'aspeutu y furrulamientu de Linux. Hailes dende grandes sistemes completos totalmente equipaos (respaldaos por compañíes) fasta les más llixeres qu'entren nun llaveru USB o furrulen n'ordenadores vieyos (usualmente desendolcaes por voluntarios).

Usar Linux.

GNU/Linux nun ye más abegosu d'usar que Windows, y tien munches más funcionalidaes. Tárdase namái unos minutos en familiarizase con una distribución como Ubuntu o Fedora, la cual vien con munchos programes instalaos.

Si necesites software de calidá comercial pa trabayar con documentos de negocios, Internet, conexón de redes, o trabayar con gráficos, ta llistu pa que lu uses. ¿Entá quies más? Linux pue facelo – Esisten miles de programes que puedes alcontrar, instalar y desinstalar d'un mou intuitivu y cenciellu.

Sicasí, nun debieres asumir que Linux ye un calcu de Windows. Pa saber qué t'espera al adientrate en Linux, suxerímoste lleer la nuesa páxina rellacionada con migrar a Linux.

La rempuesta completa

Cuando obtienes una distribución de GNU/Linux, tamién obtienes la llibertá pa estudiala, copiala, camudala, y redistribuyila. – Eso ye lo que la fai llibre daveres.

Munches compañíes desendolquen los sos propios sistemes operativos basaos nel sistema central GNU software: Faen productos derivaos sobro los que nun tienen los drechos esclusivos. Entós, ¿cómo funciona too?

  • La mayoría de les empreses consiguen beneficios gracies al sofitu téunicu y otros servicios de pagu rellacionaos cola so distribución de GNU/Linux. Los veceros empresariales paguen pola garantía d'anovamientos de seguridá y asistencia, ya inclusu munches vegaes formación y modificaciones al software p'adecualu a les sos necesidaes.
  • Otres compañíes, como HP ya IBM, contribúin con Linux porque preinstálenlu nos sirvidores que venden.
  • Una enorme comunidá participa nel desendolcu y meyora del software, amenorgando los costos y meyorando la eficiencia.

Finalmente, les persones avecen a obtener el software de baldre, mentantu que los veceros empresariales suelen tar satisfechos de pagar por un sofitu téunicu más avanzáu.

Por qué Windows non

Por qué tenemos d'evitar usar Microsoft Windows

Pásate a Linux

Aú descargar y cómo adientrase'n Linux