Entrugues frecuentes rellacionaes con Linux

La nuesa páxina sobro Linux cubre la información esencial. Esperamos qu'esta llista d'entrugues frecuentes y les sos rempuestes puedan ayudate si necesites más información.


Entrugues xenerales

¿Hai dalguna diferencia ente "GNU/Linux" y "Linux" ?

Siguís refiriendovos alternadamente a unu y a otru, ¿hai dalguna diferencia?

Orixinalmente, Linux refierse a una parte central del sistema, denomada kernel o nucleu, qu'allúgase dientro del sistema GNU. Lo que los usuarios usen nos sos ordenadores son, pa ser precisos, "distribuciones del sistema GNU/Linux".

Na práutica, la pallabra "Linux" tuvo meyor recibimientu, y anguaño la xente usa cenciellamente "Linux" pa referise al sistema enteru. (Nun creyeríeis la controversia que xenera esti fechu...)

Denomar al sistema como GNU/Linux tien más xacíu téunicamente (en realidá los usuarios usen más de "GNU" y pocu de "Linux"), pero tamién filosóficamente: la fortaleza del movimientu del Software llibre entamó y entá se caltién gracies al proyeutu GNU.

Denomar Linux al sistema ye más práutico y cenciello pa usuarios de ordenadores que creen que Windows ye lo único sobro la Tierra.

Equí usamos dambos términos y esperamos que naide nun se sienta ofendíu por ello.

¿Y qué tien que ver esi software con un "ñu" (GNU)?

Cuando Richard Stallman escomencipió a diseñar GNU, el principal sistema n'usu yera Unix, que ye privativu. Como GNU tien funciones asemeyaes a (y ye compatible con) Unix, pero ye software llibre, inventó'l términu GNU que significa GNU's Not Unix (n'asturianu, "GNU nun ye Unix"). Ye un acrónimu recursivu. Si esfrutes con esta triba d'humor, mira lo que significa GNU Hurd.

¿Linux ye una marca rexistrada?

Sí. Nun pue vender cualesquier programa que se-y ocurra baxo'l nome de Linux®. La marca rexistrada pertenez al institutu the Linux Mark Institute.

¿GNU/Linux ye l'únicu sistema operativu llibre esistente?

Non. GNU/Linux ye, con muncha diferencia, el sistema llibre más usáu; sicasí, esisten dellos sistemes más que tamién son llibres.

Esto inclúi a los derivaos d'UNIX FreeBSD, NetBSD, OpenBSD y OpenSolaris, el clon de BeOS Haiku OS, el clon de Windows NT ReactOS, el clon de DOS FreeDOS, Plan 9 de los llaboratorios Bell y Syllable, por mentar dalgunos.

¿Mac OS X ye una distribución de Linux?

Non. Hai pocos componentes de software llibre en Mac OS X y, téunicamente, ye mui asemeyáu a los sistemes GNU/Linux. Pero en xeneral ye software privativu: tolos problemes cola llibertá en Windows apliquense tamién en Mac.

Pescanciar el software llibre

¿"Software Llibre" y "Software de Códigu Abiertu" son lo mesmo?

Sí y non.

Téunicamente, la mayoría de programes de códigu abiertu son software llibre y viceversa.

Filosóficamente, son mui distintos. El términu "códigu abiertu" acuñóse pa facer ver al "software llibre" más atractivu; los que lu sofiten venlu como una meyor forma de desendolcar software.

Quienes sofiten el términu "software llibre" valoren la llibertá, non simplemente cómo se fai el software, y por ello sostienen que "códigu abiertu" pierde'l xacíu.

El términu que vusté decida usar dependerá de la so visión del software.

¿Por qué se vienden dalgunes distribuciones, en cuenta de regalase?

En realidá, dalgunos sitios web vienden distribuciones de Linux. Entós, ¿por qué dices que ye "llibre y disponible de baldre"?

El conceutu de software llibre, refierse a una custión de llibertá, non de precios. Tienes la llibertá de copiar, estudiar, camudar y regalar el software llibre.

La mayoría de les empreses que desendolquen software llibre ganen dineru vendiendo servicios rellacionaos col so software, n'arróu de vender el propiu software. De vezu esto faise vendiendo too como un paquete: el cliente merca'l CD, el manual y el contratu de serviciu téunicu al mesmu tiempu. El software entá garantiza los tos drechos.

Más: Cómo malinterpretar el software llibre | FLOSS concept booklet.

¿Por qué dalgunes distribuciones de Linux nun son llibres ensembre?

Dalgunes distribuciones tán disponibles de baldre, pero inclúin software privativu. ¿Por qué asocede esto?

Normalmente hai trés tipos de polítiques rellacionaes cola inclusión de software privativu:

  • Dalgunos creadores de distribuciones de GNU/Linux permiten software privativu p'activar funciones del hardware. Esto asocede porque a dalgunos fabricantes de Hardware como NVidia nun-yos importa la llibertá de los sos veceros, y namái espublicen controladores y firmware privativu (dalgunos d'ellos nun espublicen absolutamente res, como Broadcom). Estos tán disponibles de baldre (son freeware), pero baxo llicencies restrictives. Por esta razón, distribuciones como Ubuntu inclúin estos componentes p'ameyorar la compatibilidá del hardware.

  • Dalgunos creadores de distribuciones de GNU/Linux nun sacrifiquen la llibertá del software y asegúrense de que la so distribución seya completamente llibre, como nel casu de Trisquel, que remanez d'Ubuntu (pero quíta-y los componentes privativos)

  • Dalgunos creadores de distribuciones de GNU/Linux empaqueten software llibre y privativu ensin distinción. A ellos nun-yos presta que los usuarios camienten na so llibertá, y prefieren dar publicidá a les carauterístiques téuniques del so productu. L'usar tales distribuciones nun ye muncho meyor qu'usar Windows. ¡Nosotros valoramos la to llibertá y encamentamos qu'escueyas con procuru!

¿Ye tamién Mac OS un sistema operativu llibre?

¿Toles razones pa evitar Windows apliquense a Mac OS?

Ye habitual que los usuarios de Mac crean tar llibres de les torgues asociaes con Windows. Desafortunadamente, nun ye'l casu.

Mac OS X sí tien dalgunos componentes de baxu nivel que son software llibre; y Apple pon menos enerxía n'atar a los sos usuarios (con esfuercios como BootCamp).
Sicasí, l'usuariu final pierde igualmente la so llibertá: Darréu a la llicencia privativa, nun pue usar Mac OS X pa cualesquier envís, nin copialu, estudialu, camudalu o redistribuyilu.

Afortunadamente, y porque eses llibertaes importen bastante, ye dable usar distribuciones de GNU/Linux (como Ubuntu) baxo equipos Mac.

¿Los usuarios de Linux son los que faen descargues illegales?

¿Linux nun ta rellacionáu con "crackeos", "piratería" y webs de descargues "illegales"?

¡Non!

Si lleísti o escuchasti esto per ende, tienes d'anovar la to perspeutiva. Linux nun tien res que ver con estes coses. Si decides facelo o prefieres les descargues intelixentes, y llegales, Linux furrulará xusto como Windows. Desafortunadamente nun se pue identificar a los lladrones pol modelu d'automóvil qu'usen; lo mesmo pasa col sistema operativu.

GNU/Linux creóse por persones a les que nun-yos presta la idea de que tolos ordenadores del mundu usen los productos privativos d'una mesma empresa. ¡Y eso, definitivamente nun tien res de malo!

Más información nel artículu: Cómo malinterpretar el software llibre.

¿Ye Linux un mou de comunismu?

"Too tien que ser llibre" y "Naide ye dueñu de nada" suena abondo medranoso. ¿Ye Linux y la so llicencia GPL, p'anarquistes y comunistes?

Linux nun tien res que ver con un sistema políticu y cualquier persona — independientemente de les sos opiniones polítiques — pue usalu. Esto desplícase bien claro nel nuesu artículu Cómo malinterpretar el software llibre.

Instalar Linux

¿Linux vien preinstaláu nos ordenadores?

¡Si! Hai un sitiu web fechu precisamente pa eso, LinuxPreloaded.com, que tien una llista de vendedores d'ordenadores portátiles y de mesa con Linux.

¡Pero nun necesites mercar un ordenador nuevu pa usar GNU/Linux!

¿GNU/Linux ta disponible na mio llingua?

Si. Toles distribuciones principales, como les qu'encamentamos, tan disponibles en delles llingües, y sofiten munches tribes de tecláu.

A la escontra de Windows, toles llingües tan incluyíes en cada CD d'instalación, asina que nun fai falta que descargue (¡o pague!) otra versión completa pa camudar la llingua del so equipu.

¿Ye llegal instalar Linux nel mio equipu?

¡Hai una etiqueta brillante de Windows sobro él! ¿Puedo desaniciar Windows o usalu xunto con Linux?

. Ye completa y absolutamente llegal (suponiendo, claro, que ye'l to ordenador).

La etiqueta ye pura publicidá, nun tien valor llegal. Creemos que ye un drechu fundamental escoyer qué software instalar nel nuesu propiu hardware.

En realidá, esti drechu ta amenazáu pola apaición d'elementos como DRM y Trusted Computing. Llea'l nuesu artículu "La importancia d'una sociedá llibre" si ta interesáu nesti tema.

¿Tengo que mercar un nuevu ordenador pa usar Linux?

Definitivamente, non. Furrulará tranquilamente nel to ordenador actual.

Lo único sobro lo que podría esmolecese ye si usa hardware especial mui nuevu, como tarxetes gráfiques. D'otra miente, casi toles distribuciones de Linux puen funcionar en PCs corrientes (davezu denomaos "i386" o "x86"), ordenadores con procesadores de 64 bits y ordenadores Mac de Apple (incluyendo les series G5, G4, G3). Llea cómo pue probar ya instalar Linux nel so ordenador, bien en solitario o xunto con Windows.

Usar Linux.

¿Funcionará Microsoft Office baxo Linux?

Non.

Téunicamente ye dable adautar Microsoft Office a Linux, pero Microsoft nun quier permitir a los usuarios d'Office escoyer el so sistema operativu. Arriendes, tamién hai unos inconvenientes con Office y l'apertura (como la feroz oposición de Microsoft de sofitar el formatu OpenDocument.

De cualesquier mou, esiste un completísimu paquete ofimáticu llibre y fiable: OpenOffice. O pues escoyer alternativa de Códigu abiertu fecha pola comunidá, LibreOffice, que ye una derivación "fork" d'OpenOffice.org. Coles dos abrirá ensin problemes tolos sos ficheros en formatu Word, Excel y PowerPoint, y son llibres dafechu (llibres como en llibre espresión y entrada llibre). Y funcionen tamién en Windows igual qu'en Linux.

OpenOffice.org   LibreOffice.org

¿Puedo reproducir los mios DVDs y MP3s en GNU/Linux?

La rempuesta cenciella sedría "sí", magar que namái sedría la metada de la verdá.

Unes poques distribuciones de Linux nun inclúin software que reproduza MP3 darréu a la situación con esa patente. Pero como esti problema nun afeuta direutamente a los usuarios finales, la mayoría de les distribuciones faen que seya mui fácil pal usuariu instalar el sofitu pa MP3 dempués de la instalación del sistema, pa finalmente reproducir estos ficheros de soníu llegalmente, pa un usu non comercial.

Per otru llau, la situación colos DVDs ye más complexa. La mayoría, sinón toos, los DVDs tan cifraos con un sistema denomáu "CSS". Hai un programa llibre con bon sofitu, nomáu libdvdcss, que pue descodificar DVDs. Sicasí, esmucir les torgues de los DVDs ye illegal en munchos llugares del mundu, incluyendo los Estaos Xuníos y la Xunión Européa.

Hai una solución llegal pa reproducir los tos DVDs en Linux cuando libdvdcss ye illegal. La empresa Fluendo tien desendolcao una aplicación (non-llibre) con esi envís que se pue mercar na so páxina web.

Los DVDs ensin cifrar, como la mayoría de los creaos en casa, puen reproducise perfeutamente usando namái software llibre.

¿Puedo xugar a los xuegos 3D más famosos en GNU/Linux?

Si y non: Hai xuegos, por exemplu dellos xuegos de id Software como la serie Quake y Doom 3, Unreal Tournament, Cold War y munchos más, tienen versiones pa Linux.

Sicasí, los xuegos más populares sólo funcionen en Windows y, dacuando, en Mac OS. Dellos xuegos pa Windows, como Call of Duty 4 o GTA Vice City, se pueden executar en GNU/Linux con Wine o la so variante non-llibre CrossOver, que necesita dalgo de trabayu desagradable pal usuariu. Pa ver una llista de xuegos que se sabe que funcionen en Wine, visita la so base de datos de xuegos.

¿Más entrugues?

Si tienes una entruga que nun se trata equí, hai munches comunidaes p'ayudate. La nuesa seición "Más" t'ayudará a alcontrar un sitiu afayadizu nel qu'entrugar.

Si se t'ocurre una entruga frecuente qu'entá nun contestáramos, fainoslo saber o, entá meyor, informa d'un bug nuevu.