Qué ye meyor en Linux

• Ye llibre

  Al contrariu de Windows, GNU/Linux ye software llibre – . ¡Instálalu en tolos ordenadores que quieras y da-yos copies a los tos collacios! Inclusu pues estudialu, camudalu como te pruya, o facer y vender la to propia distribución.

• Programes

  Esiste una descomanada llista de programes llibres disponibles pa Linux de baldre. Pues facer documentos profesionales, quemar CDs de música, editar semeyes, diseñar un sitiu web u organizar la to música xusto dempués d'instalar. Nun hai necesidá de mercar software de 200$ con llicencies restrictives.
  L'instalador incorporáu fai que seya increíblemente fácil alcontrar, instalar y desinstalar programes
  Arriendes ye seguro: Pues escaecete del software con versiones de preba, o el peligrosu freeware que contamina la web.

• Ensin molesties

  Pa caltener el ordenador en forma col pasu del tiempu nun tien que ser necesario una llucha constante. Un añu dempués de la so instalación, GNU/Linux furrula tan rápido como'l primer día. Ya inclusu pue da-y vida al to vieyu ordenador.
  Arriendes, Linux permítete tener lo que quies y desfacete de lo que nun quies. Si tuvisti problemes pa desfacete del MSN Messenger, les notificaciones d'actualización de Windows, o l'asistente Clippit, Linux prestaráte abondo.

• Seguridá

  Escaezte de los costosos y restrictivos anti-virus, anti-spyware, anti-"res" y anti-"tou". Linux ye abondo, enforma seguru.
  A los usuarios de Windows fáise-yos difícil de creer que nun esiste spyware nin virus en Linux — pero ye cierto. El software maliciosu tienlo bien complicao nun sistema bien fechu.
  Los anovamientos regulares y cenciellos de GNU/Linux caltienen el sistema dafechamente a salvu.

• Sofitu

  Linux saca partíu d'un gran xacíu de comunidá, cuya amabilidá podrá sosprendete. Si trates de facer daqué complicao y nun yes quien a ello, hai muncha xente dispuesto a echate un gabitu. La nuesa páxina "Más" ndicaráte au tienes d'empobinate.
  Les compañíes darrera de les principales distribuciones de GNU/Linux, como Canonical y Red Hat, tamién apurren sofitu téunicu especializáu y comercial.

Lo que ye cásique igual qu'en Windows

Fundamentalmente, al usar GNU/Linux los usuarios alcuéntrenlu bastante parecíu a Windows o Mac OSX.

• Configuración xeneral

  Si crees que pa usar Linux entá tienes qu'usar códigu y la consola, equivóqueste. ¡Les coses fai tiempu que camudaron!
  Lo mesmo que Windows, Linux tien d'aniciase al prender el ordenador, y llueu pue entamase a usar los programes. La barra de xeres y les aplicaciones parécense a les de Windows o Mac OS X.
  
  Ver más: tenemos captures de pantalla

• Navegación web y xeres comunes

  La bona noticia ye qu'Internet vese igual dende Linux (de fechu, pues navegar col mesmu programa, si yá uses Firefox o Google Chrome). Y por supuestu, pues usar la to coleición de música y semeyes tamien. Los ficheros y direutorios remánense con un xestor de ficheros asemeyáu a Esplorador de Windows.

Lo que nun ye tan bono en Linux

• Sofitu de drivers

  Los fabricantes non siempres ufren controladores pa Linux nin espublicen les especificaciones de los sos preseos.
  Por esta razón, a vegaes nun hai controladores pa les tarxetas gráfiques más nueves nel mercáu; los voluntarios tienen d'aplicar inxeniería inversa a los controladores de Windows. Arriendes, dalgunos úfrense gratuitamente, pero baxo llicencies restrictives.
  Llamentablemente, lo mesmo asocede con munches tarxetes WiFi.
  Hai que dicir, sicasí, que la mayoría de los ordenadores con hardware estándar, furrulen direutamente coles principales distribuciones de Linux. Hardware común como llaveros USB o cámares fotográfiques enxamás tienen problemes.

• DVDs, formatos restrictivos

  Munchos formatos multimedia al nuesu alrodiu son propietarios, y les sos especificaciones nun se dan a conocer; esto supón, a grandes rasgos, que los programadores de Linux tienen de pescudar cómo lleelos ensin ayuda de los creadores del formatu.
  Esto podría llevate a saltate la encriptación en dalgunos DVD's y la DRM en dalgunos ficheros de soníu, entá y cuando s'heban alquirío completamente de mou llegal, porque d'otru mou quiciabes nun furrulen en Linux. Desafortunadamente, dependiendo d'aú vivas, saltase les restricciones pue considerase illegal (magar que mercares el productu de mou llegal).
  
  Lleer más na na seición d'Entrugues frecuentes: ¿Puedo reproducir los mios DVDs y MP3s en GNU/Linux?

• Xuegos

  Los xugadores experimentaos decataránse de que'l mundu de los xuegos en Linux ye menos profesional qu'en Windows: Los grandes desendolcadores de videoxuegos paecen tener pocu interés pola llibertá na computación, lo que significa que munchos de los xuegos más famosos nun furrulen en Linux, o requieren d'emuladores privativos pa furrular.
  Afortunadamente hai comunidaes enforma actives pal desendolcu de xuegos llibres, y tienen fecho bastantes xuegos llibres de bona calidá, tanto en 2D como en 3D. Visita foru de xuegos d'Ubuntu p'atopar más información.
  
  Lleer más na na seición d'Entrugues frecuentes: ¿Puedo xugar a los xuegos 3D más famosos en GNU/Linux?

• Ivernación

  En dalgunos ordenadores, ivernar nun ye de tou fiable, una vegada más, por problemes de controladores. El problema más avezáu ye la perda de la conexón WiFi dempués d'ivernar en ordenadores portátiles cuyos controladores nun son llibres.

Conclusión

Saber con antelación si se va a esfrutar de Linux depende en gran midida de lo qu'esperes d'él.

• Si quieres que Linux seya esautamente igual a Windows, dablemente quedarás deceicionáu. GNU/Linux fáise por persones que tienen l'enfotu de que seya distintu. Ente ellos esisten distintes visiones tocante a cómo sedría'l sistema operativu ideal. Esta diversidá d'opiniones fai que participar en la creación de Linux seya daqué tan especial ya interesante.
• La to llibertá importa. Milenta de persones en comunidaes y compañíes trabayen pa facer software sobro'l que tu puedas exercer la to llibertá. Usandob GNU/Linux ye la forma más cenciella de facelo.
• ¡Ye divertío! El nun tener qu'esmolecese de spyware, virus, activación de programes, programes qu'espiren, o alcontrar software que ye realmente llibre, fai que de la nada usar un ordenador seya una esperiencia agradable.

Esperamos que faigas aína la migración. Hai una gran comunidá esperándo-y y naide va a dicite "mércalu y rexístrate".