De Windows a GNU/Linux

Ecce le aspectos que le usatores medie generalmente trova melior, le mesme, o minus bon, quando illes cambia de Windows a GNU/Linux.

Que es melior in GNU/Linux

Es libere

In contrasto a Windows, GNU/Linux es software libere – un systema que respecta vostre libertate. Installa lo in tote vostre computatores e face copias pro vostre amicos! Vos pote mesmo studiar lo, transformar lo secundo vostre preferentia, o construer e vender vostre proprie distribution

Programmas

Il ha un tresor de applicationes libere disponibile sin costo sub GNU/Linux. Pro editar documentos professional, gravar CDs de musica, elaborar photos, designar un sito web, o organisar musica; il ha nulle necessitate de pagar 200$ pro software con licentias restrictive.

Le installator interne lo rende incredibilemente facile trovar, installar e remover programmas.

Illo es anque secur: oblida le software de demonstration plen de limites e le programmas gratuite e nocive que pollue le web.

Sin lucta

Tener vostre computator in bon condition durante longe tempore non debe esser un lucta. Un anno plus tarde, GNU/Linux se executa tanto rapidemente como in le prime die. E illo pote dar un nove vita a vostre vetule computator.

In ultra, Linux vos permitte seliger lo que vos vole e non vole haber. Si il vos ha essite difficile disfacer vos de Internet Explorer, Windows Media Player, o adware e barras de instrumentos de navigatores web, vos trovara isto un delivrantia.

Securitate

Oblida le costose e restrictive programmas anti-virus, anti-spyware, anti-isto e anti-illo. GNU/Linux es multo, multo secur.

Il es sovente difficile pro le usatores de Windows creder que il non ha spyware ni viruses sub GNU/Linux — ma il es ver. Le programmas malitiose pote difficilemente facer alcun cosa in un systema ben construite. 

Le actualisationes de software regular e facile mantenera omnes totalmente secur.

Supporto

GNU/Linux beneficia de un grande senso de communitate, de que le amabilitate te surprendera. Si tu tenta facer qualcosa complexe ma non succede, il ha multe personas preste a adjutar te. Nostre pagina "Plus" include alcun referentias.

Le companias detra le distributiones principal de GNU/Linux, como Canonical e Red Hat, anque forni supporto commercial experte.

Que es generalmente le mesme in GNU/Linux

Generalmente, le usatores medie trova que GNU/Linux es similar in uso a Windows o macOS.

Configuration general

Si vos crede ancora que GNU/Linux es controlate con codice e le linea de commando, vos deberea actualisar vostre perspectiva!

Como Windows, GNU/Linux debe initiar quando vos activa vostre computator, e postea vos usa programmas in illo pro facer diverse cosas. Le barra de cargas e le disposition del applicationes pare familiar al usatores de Windows o macOS.

Navigation del web e actiones commun

Le Web ha exactemente le mesme aspecto con GNU/Linux (de facto, tu pote navigar per le Web con le mesme programma si tu jam us Firefox o Google Chrome). E, naturalmente, tu pote gerer tu collection de imagines e musica del mesme maniera. On naviga per le files e dossiers con un gestor de files similar a Windows Explorer.

Que es minus bon in GNU/Linux

Supporto de driver

Fabricantes de computatores non sempre (ancora) edita le drivers de dispositivo pro GNU/Linux ni publica le specificationes complete.

Dunque, le drivers es a vices indisponibile pro le cartas graphic recente e avantiate; voluntarios ha derivate alcunes ab le drivers de Windows per medio de ingenieria inverse.

Regrettabilemente, le mesme problema occurre con multe cartas WiFi bon mercato.

Nonobstante, le grande majoritate de computatores con dispositivos standard functiona immediatemente con le principal distributiones de GNU/Linux. Le dispositivos commun como claves USB o cameras photographic nunquam es un problema.

DVDs, formatos restringite

Multe formatos multimedial in uso es proprietari e sin specification aperte; isto vole dicer, in general, que le programmatores de GNU/Linux debe determinar como leger los sin adjuta del designatores del formato.

Isto pote necessitar que vos contorna le restrictiones in alcun DVDs e le DRM in alcun files de musica, mesmo si vos los ha acquirite in plen legalitate, pro facer los functionar sub GNU/Linux. Infortunatemente, dependente de ubi vos vive, tal processos de contornamento pote esser illegal mesmo si vos ha acquirite vostre material toto legalmente.

Lege plus in nostre FAQ de GNU/Linux:

Jocos

Le fanaticos de videojocos pote trovar que le insimul de videojocos sur GNU/Linux es minus professional e instantanee que sub Windows. Le grande editores de videojocos comencia lentemente a devenir interessate in le mundo del software libere, e isto vole dicer que multe titulos ben cognoscite non functiona sub Linux, o ha besonio de certe emulatores proprietari pro poter functionar.

Nonobstante, il ha un communitate multo active pro le disveloppamento de videojocos in software libere, e illes ha producite un numero considerabile de jocos de bon qualitate, in 2D e 3D, e libere. Refere te al foro de jocos de Ubuntu pro trovar plus information. E con le version del popular platteforma Steam pro GNU/Linux,le numero de jocos supportate in Steam pro GNU/Linux ha augmentate rapide.

Lege plus in nostre FAQ de GNU/Linux:

Hibernation

A causa de problemas de driver supra mentionate, le hibernation non sempre functiona ben. Le problema le plus commun es le perdita del connexion WiFi post le hibernation sur portabiles sin drivers libere.

Conclusion

Vostre satisfaction con GNU/Linux depende generalmente sur lo que vos expecta de illo.

  • Si tu prefererea que Linux sia exactemente como Windows, tu essera probabilemente disappunctate.. GNU/Linux es construite per personas qui vole que illo sia differente. In le communitate del software libere, le membros ha differente visiones sur le characteristicas de un systema de operation ideal. Iste differentias resulta in varietate, e iste varietate es lo que rende GNU/Linux tanto special e interessante.
  • Vostre libertate importa. Milles de personas in communitates e in companias travalia al construction de software sur le qual vos pote exercer iste libertate. Usar GNU/Linux es le maniera le plus facile de facer isto completemente.
  • Es divertente! Le absentia del necessitate de preoccupar se de spyware, visuses, registration de programmas, versiones demo que expira o trovar software que es vermente libere, rende subito le uso de un computator multo agradabile.

Nos spera que vos cambiara tosto. Il existe un grande communitate que attende vos. Nemo in illo demanda que vos compra qualcosa e nemo vole haber vostre datos personal.